NAKUUSA Youth Forum

MIPI – Meeqqat Inuusuttullu Pillugit Ilisimasaqarfik, ukiaq 2011-mi NAKUUSA Youth Forum-eqartitsinerani nakkutilliisutut suleqataasutullu peqataavoq. Amerlasuut ilisimasaattut NAKUUSA Youth Forum Ilulissani oktober 2011-mi ingerlanneqarpoq. Ataatsimeersuarnermi meeqqat inuusuttuaqqallu 39-it 13-15-inik ukiullit peqataatinneqarput, periarfissarisimavaallu isummersornissartik ilaatigut makkununnga tunngassuteqartunik: Kalaallit Nunaanni ajunngitsumik ajortumillu meeraaneq. Ataatsimeersuartut oqariartuutaat meeqqanut, inuusuttuaqqanut, inersimasunut minnerunngitsumillu politiikerinut ingerlateqqinneqarput. Oqariartuutaat pingaarnerit naggataarutaasumik oqaaseqaatinngorlugu Ilaqutariinnermut, Kultureqarnermut, Ilagiinnut aammalu Naligiisitaanermut Naalakkersuisumut Mimi Karlsen-imut tunniunneqarpoq, ataatsimeersuarnerup ulluani kingullermi.

MIPI nakkutilliisuunermini suliassarilersimavaa NAKUUSA Youth Forum-ip ingerlarngata nalunaarusiarineqarnissaa.

Nalunaarusiarineqarneranut siunertat ilagaat susassaqartut aalajangiisartullu meeqqat oqariartuutaannik apuussiviginissaannik isumannaarinninnissaq. MIPI-p neriuutigaa meeqqat oqaaseqaataat tusaatissatut tiguneqarumaartut aammalu peqataasimasut peqataanerminnut qujassuteqarfigineqalluassasut. Ataatsimeersuaqataasut ullaamiit unnussuarmut suleruluttarsimapput, nalunaarusiamilu ersersinneqarpoq oqariartuutaat asuliinnanngitsut.

Paasisaqarnerorusukkuit uunga saaffiginnigit: tdra@nanoq.gl uungaluunniit sianerlutit: 34 69 40.

Uani nalunaarusiaq kalaallisut allanneqarsimasoq atuarsinnaavat (pdf-fil 3,72 MB).

Atuarluarina!